Skilmálar MasterCard kreditkorta

 

Viðskiptaskilmálar MasterCard korta

1.   SKILGREININGAR, UMSÓKN, KORTAÚTGÁFA, GILDISTÍMI

1.1 Eftirfarandi hugtök í skilmálum þessum eru skilgreind á þennan hátt:

Reikningshafi/aðalkorthafi er sá sem gert hefur samning um stofnun MasterCard korta­reiknings.

Korthafi er reikningshafi eða annar sá sem reikningshafi heimilar að hafi kort, aukakorthafi, sem gefið er út á MasterCard kortareikning hans.

Útgefandi er Kreditkort hf.

1.2. Útgefandi áskilur sér allan rétt til að leita allra upplýsinga um getu umsækjanda og fjárhag, sem nauðsynlegar eru að mati útgefanda til að afgreiða umsókn, þar á meðal lánayfirlit (FE-skrá) um fjárhagsstöðu korthafa í bönkum og upplýsingar frá Creditinfo Lánstrausti hf., s.s. áhættumat, upplýsingar úr vanskilaskrá og öðrum gagnagrunnum sem félagið rekur.  Útgefanda er heimilt að fela fjármálafyrirtæki sem hann velur, að yfirfara umsókn og leita áðurnefndra upp­lýsinga.  Áskilinn er réttur til að synja umsóknum án skýringa.

1.3. Kreditkort áskilur sér ennfremur rétt til þess að afla þeirra upplýsinga er greinir í lið 1.2. meðan að reikningshafi er í viðskiptum hjá félaginu ef nauðsyn krefur, t.d. þegar greiðslufall verður af hálfu reikningshafa eða þegar reikningshafi hefur sótt um hækkun heimildar eða önnur þau atvik eru fyrir hendi er gefa tilefni til að kanna fjárhagsstöðu hans.

1.4. Við útgáfu MasterCard korts stofnast korta­reikn­ingur.  Standi korthafi við skuldbindingar sínar er kort hans endur­nýjað, án umsóknar, en gegn árgjaldi.  Árgjald er fært fyrirfram á korta­reikning, skv. gjaldskrá, fyrir 12 mánuði í senn.  Hægt er að semja um útgáfu fleiri en eins MasterCard korts á kortareikning reikningshafa, enda liggi fyrir samþykki reikningshafa.  Öll MasterCard kort eru með mynd af korthafa.  Korthafi þarf að leggja fram mynd sem varðveitt er í gagnagrunni Reiknistofu bankanna (RB) sé mynd ekki þar til staðar.

1.5. Kreditkort sendir korthafa útgefið kort í pósti, nema korthafi sæki það sjálfur í afgreiðslu Kreditkorts hf.

1.6. MasterCard kortið er eign útgefanda og má hann innkalla það án fyrir­vara, komi til misnotkunar eða vanskila hjá reikningshafa eða korthafa. Korthafa ber að afhenda innkallað kort í afgreiðslu Kreditkorts hf. Afhendi korthafi ekki innkallað MasterCard kort með áðurgreindum hætti getur útgefandi sent sértakan vörslusviptingarmann til að sækja kortið.

2.   ÚTTEKTARTÍMABIL

2.1. Úttektartímabil eru þrjú. Fyrir einstaklingskort er eitt úttektartímabil sem hefst 27. dag hvers mánaðar og lýkur 26. dag næsta mánaðar. Fyrir fyrirtækjakort eru tvö tímabil og velur korthafi í upphafi hvort þeirra hann notar. Annars vegar úttektartímabil sem byrjar 18. dag hvers mánaðar og lýkur 17. dag næsta mánaðar. Hins vegar úttektartímabil sem hefst 1. dag hvers mánaðar og lýkur síðasta dag sama mánaðar.

2.2. Færsluhirðar geta með samningum við einstaka seljendur eða samtök seljenda heimilað frávik frá ofangreindum úttektartímabilum, án sérstakra tilkynninga.

3.   NOTKUN KORTSINS

3.1. Korthafi skal rita nafn sitt á kortið við móttöku og hefur einn heimild til notkunar þess.

3.2. Með fyrstu notkun kortsins samþykkir reikningshafi og/eða korthafi að hlíta gildandi viðskiptaskilmálum.

3.3. Kortið veitir rétt til úttektar vöru og þjónustu hjá seljendum MasterCard um allan heim.

Útgefandi ber ekki ábyrgð á því ef móttöku korts er synjað sem greiðslu hjá seljanda, né því tjóni sem leitt getur af því.  Með sama hætti ber útgefandi ekki ábyrgð á því ef reiðufé fæst ekki tekið út á MasterCard kortið hvort sem er í hraðbönkum eða annars staðar.

3.4. Reikningshafi skuldbindur sig til að greiða að fullu allar úttektir af korta­reikningi sínum með kortum sem löglega hafa verið gefin út á reikninginn . Skuldbindingin tekur til allra úttekta samkvæmt úttektarseðlum sem korthafi hefur undirritað, sem og úttekta sem hann hefur heimilað við símapöntun, með rafrænum samskiptum, þar með talið internetviðskipti,  eða á annan hátt samþykkt til færslu á kortareikninginn.

3.5. Aukakorthafi á einstaklingskorti ber ábyrgð á greiðslu úttekta sinna á kortareikningnum óskipt með reikningshafa, aðalkorthafi ber ábyrgð á úttektum á aðal- og aukakortum.

Þegar um er að ræða fyrirtækjakort eða innkaupakort ber sérhver kort­hafi persónulega ábyrgð á öllum úttektum á kort, sem gefið er út á hans nafn, óskipt með reikningshafanum í eftirfarandi tilvikum:

 a)  Geti útgefandi sannað að korthafi hafi á þeim tíma er úttektin var gerð, vitað eða mátt vita að reikningshafi gæti ekki stað­ið við fjárskuldbindingar sem fólust í úttekt.

 b)  Þegar korthafi er eigandi, forsvarsmaður eða stjórnarmaður fyrir­tæk­isins (reikningshafa).

 c)  Þegar kort er notað til úttekta á reiðufé eða kaupa á ferðatékkum.

 d)  Þegar kort er notað í persónulega þágu korthafans, þ.e.a.s. þegar vara, eða þjónusta, sem greitt er fyrir með kortinu er ekki í þágu hags­muna reikningshafans.

3.6. Úttektir erlendis eru umreiknaðar í íslenskar krónur á þeim degi er færsla er send inn í kortakerfi útgefanda. Upplýsingar um gengi er að finna á vefsíðu útgefanda. 

3.7. Unnt er að taka reiðufé út á MasterCard kortið, en í takmörkuðum mæli þó. Ofan á slíkar úttektir í bönkum og hraðbönkum innanlands og utan leggst við kostnaður og úttektargjald samkvæmt gjaldskrá.

3.8. Þegar reiðufé er tekið út á kortið í hraðbönkum og þegar úttektir eru gerðar með notkun örgjörvalesara á sölustað, skal í stað undirskriftar nota sérstakt einstaklingsbundið auðkennisnúmer, svokallað PIN-númer, sem korthafi fær afhent með korti sínu. Þetta er leyninúmer sem kort­hafi má ekki láta aðra hafa né heldur geyma með korti sínu. Korthafi er ábyrgur fyrir öllum úttektum sem gerðar eru með PIN-númeri, nema þegar ákvæði 13.6 á við.

3.9. Heimilt er að semja svo um að reglubundin útgjöld reikningshafa og/eða korthafa, hjá innlendum seljendum séu færð á útgefin kort.  Beiðnum reikningshafa/korthafa um skuldfærslur skal ýmist beint til útgefanda eða söluaðila og skal beiðni einstakra korthafa vera nægileg. Verði vanskil á kortareikningi reikningshafa er útgefanda heimilt að stöðva allar greiðslur samkvæmt slíkum samningi án fyrirvara.

4.   STOFNGJALD / ÁRGJALD

4.1. Við útgáfu kortsins í fyrsta sinn greiðir korthafi stofngjald auk árgjalds. Korthafi heimilar útgefanda að skuldfæra kortareikning sinn fyrir árgjaldi eins og það er ákveðið hverju sinni, árlega eftir að kort er gefið út í fyrsta sinn. Fyrir aðra þjónustu greiðir reiknings­hafi og/eða korthafi eftir notkun samkvæmt gjaldskrá útgefanda.

4.2.      Útskr/úrv.gjald. / Skuldfærslugjald er innheimt fyrir hvern útsendan gíróseðil/reikning samkvæmt gjaldskrá.

5.   PLÚSKORT

5.1. MasterCard Plús eru fyrirframgreidd kort og eru því frábrugðin öðrum kreditkortum að því leyti, að notuð er fyrirframgreiðsla til að standa straum af úttektum korthafa.  Ekki er heimilt og að jafnaði unnt að stofna til skuldar með notkun MasterCard Plús, en slíkt getur þó gerst ef bilun verður í afgreiðslutækjum, símalínum, tölvum eða samskipta­bún­aði, innanlands sem erlendis. Slíkar skuldbindingar gjaldfalla hinn 2. dag næsta mánaðar eftir að úttektartímabili lýkur og er sá dagur jafn­framt eindagi.

5.2. Ekki er heimilt að láta færa á MasterCard Plús boðgreiðslur, léttgreiðslur eða aðrar reglubundnar greiðslur. Ekki er hægt að greiðsludreifa skuld er stofnast getur  á MasterCard Plús reikningi sbr. 5.1. Að sama skapi er ekki heimilt að skuldfæra afborganir af Raðgreiðslum eða MasterCard staðgreiðslulánum á  MasterCard Plús reikning.

5.3. Þegar MasterCard Plús er lokað fær korthafi ónýtta inneign greidda næsta virka dag eftir að kort hefur verið afhent útgefanda. Í þeim til­vikum að korthafi hefur gert úttektarfærslur erlendis á undangengnu 30 daga tímabili, eða reynt úttektir umfram innborganir sínar, áskilur útgefandi sér rétt til að halda inneign sem tryggingu í 30 daga fyrir greiðslu færslna sem mögulega hafa verið gerðar með kortinu, en seljend­ur hafa ekki enn sent inn úr afgreiðslutækjum sínum. Í þeim tilvikum skal útgefandi greiða korthafa vexti frá lokunardegi korts til greiðslu­dags sem jafnir eru hæstu innlánsvöxtum auglýstum af Seðla­banka Íslands á hverjum tíma.  

6.   SVEIFLUKORT

6.1. Sveiflukort MasterCard gerir korthafa kleift að greiða aðeins umsaminn hluta úttekta sinna hverju sinni, þó þannig að mánaðarlega séu greiddar að lágmarki 5.000 krónur, enda nái skuld á kortareikningi þeirri fjárhæð, þó að því tilskildu að staða kortareiknings sé undir heimildarmörkum eftir greiðslu á eindaga. Vextir af skuld á kortareikningi eru breytilegir og háðir ákvörðun útgefanda. Vextir reiknast ekki af úttektum sem greiddar eru að fullu á næsta eindaga eftir að þær áttu sér stað.

7.   GREIÐSLUR

7.1. Eindagi greiðslna vegna einstaklingskorta er annar dagur næsta mánaðar eftir að úttektartímabili lýkur. Eindagi greiðslna   vegna fyrirtækjakorta með úttektartímabil sem hefst 18. dag hvers mánaðar og lýkur 17. dag næsta mánaðar er annar dagur næsta mánaðar eftir að úttektartímabili lýkur. Eindagi greiðslna vegna fyrirtækjakorta með úttektartímabil sem hefst 1. dag hvers mánaðar og lýkur síðasta dag sama mánaðar er sautjándi dagur næsta mánaðar á eftir. Eindagi úttekta með innkaupakortum er 25. dagur næsta mánaðar eftir úttektarmánuð. Sé eindagi á frídegi færist hann til næsta opnunardags banka.

Útgefandi sendir reikningshafa mánaðarlega yfirlit, eða veitir honum rafrænan aðgang að slíku yfirliti, um færslur á kortareikninginn á næstliðnu timabili og upplýsingar um stöðu reikningsins við lok úttektartímabilsins auk áfallins kostnaðar og áfallinna vaxta á eindaga, auk greiðslutilmæla með greiðsluseðli eða rafrænum hætti.

Á greiðslutilmælunum sem handhöfum sveiflukorta eru send kemur fram hver sé sú lágmarksfjárhæð sem skylt er að inna af hendi á eindaga. Lágmarksgreiðsla skal vera 5.000 krónur, enda nái heildarskuldin þeirri fjárhæð.

Nýti handhafi sveiflukorts heimild sína til að greiða aðeins hluta útistandandi skuldar, eða lágmarksfjárhæðina, reiknast vextir á ógreiddar eftirstöðvar frá eindaga og koma til greiðslu á næsta eindaga og síðan áfram milli næstu gjalddaga, svo lengi sem reikningshafi nýtir heimild sína til að greiða aðeins hluta skuldar sinnar.

Innborganir á kortareikninginn ráðstafast þannig að fyrst greiðist áfallinn kostnaður, þá áfallnir vextir og síðan skuld vegna úttekta.

7.2. Hafi greiðsla ekki borist á réttum eindaga, leggst vanskilagjald skv. gjald­skrá á skuldina og vanskilavextir, eins og þeir eru auglýstir af Seðla­banka Íslands hverju sinni, frá eindaga til greiðsludags. Áskilinn er rétt­ur til að stöðva allar greiðslur af kortareikningi, hvort heldur sem er vegna nýrra úttekta eða umsaminna greiðslna, verði greiðslufall á ein­hverjum hluta gjaldkræfrar skuldar á kortareikningi reikningshafa sam­kvæmt bókum útgefanda.

7.3. Útgefandi áskilur sér rétt til að fela innheimtufyrirtæki eða lögmanni inn­heimtu á vanskilum ásamt öllum áföllnum og áfallandi kostnaði, komi til vanskila á kortareikningi reikningshafa.

7.4. Hafi vanskil korthafa varað í a.m.k. 90 daga frá eindaga og vanskilin eru vegna skuldar sem er a.m.k. kr. 40.000,- að frátöldum áföllnum vöxtum og kostnaði, áskilur útgefandi sér rétt til að fela lögmanni í sinni þjónustu að tilkynna nafn reikningshafa á vanskilaskrá Creditinfo Ísland (Lánstrausts).

7.5. Ef korthafi eða reikningshafi hefur athugasemdir við færslu á kortareikning, skal hann tilkynna það útgefanda eigi síðar en 90 dögum eftir skráða dagsetningu færslu á reikningsyfirliti. 

7.6. Í þeim tilvikum er seljandi hefur ekki innt af hendi þá vöru eða þjónustu er korthafi greiddi fyrir með kortinu getur korthafi skilað skriflegri kvört­un til útgefanda allt að 90 dögum eftir að afhending átti að eiga sér stað. Telji útgefandi að afhending hafi sannanlega ekki átt sér stað endurgreiðir útgefandi korthafa andvirði hins selda. Útgefandi endurgreiðir þó aldrei úttektir hafi óvið­ráð­an­legar ytri aðstæður, sem falla undir venjulegar reglur kauparéttar undir force major, hamlað afhendingu.

8.   ÚTTEKTARHEIMILD

8.1. Reikningshafi ábyrgist að ekki verði tekið út á einstök MasterCard kort umfram útgefnar heimildir og að heildarúttektir á kortareikning hans verði ekki umfram það sem samið hefur verið um.

8.2. Korthafi skuldbindur sig til að taka ekki út á MasterCard kortið fyrir hærri fjárhæð en sem nemur úttektarheimild.

9.   TRYGGINGAR

9.1. Reikningshafi og/eða korthafi skal leggja fram þær tryggingar fyrir út­tektum sem útgefandi metur fullnægjandi.

10. UPPSÖGN / INNKÖLLUN 

10.1. Vilji reikningshafi og/eða korthafi segja upp viðskiptum sínum skal það gert skriflega, a.m.k. tveimur  mánuðum áður en árgjald kortsins fellur í gjalddaga. Berist uppsögn síðar skal korthafi greiða gjald vegna útgáfu nýs korts. Áfallið árgjald, eða hluti þess, fellur ekki niður þrátt fyrir uppsögn. Stofngjald kortsins er óendurkræft. Reikningshafi getur hvenær sem er tilkynnt um lokun útgefinna korta og ber ekki ábyrgð á úttektum á lokuð kort frá því að tilkynning og kort berst útgefanda og staðfesting á lokun kortsins hefur borist frá útgefanda til reikningshafa. Korthafi getur með sama hætti bannað frekari úttektir á kort sem gefið hefur verið út á hans nafn.

10.2. Útgefandi getur hvenær sem er sagt upp viðskiptum við reikningshafa og/eða einstaka korthafa og innkallað útgefin kort.

10.3. Innkalli útgefandi MasterCard kortið, skal korthafi tafarlaust klippa kort­ið og senda til útgefanda. Aldrei má taka út á kort sem innkallað hefur verið af útgefanda. Seljandi hefur fulla heimild til að klippa og/ eða taka í sína vörslu innkallað MasterCard kort.

11. GLATAÐ MASTERCARD KORT

11.1. Ef MasterCard kort glatast skal korthafi tafarlaust tilkynna það útgef­anda. Þegar korthafi fær nýtt kort greiðist endurútgáfugjald.

11.2. Korthafi skal, þar til tilkynning hans berst útgefanda, bera það tjón sem hann hefur orðið fyrir, vegna taps, þjófnaðar eða fölsunar á kortinu, en þó ekki meira en sem nemur 150 evrum í hverju tjónstilviki, nema ef um stórfellt gá­leysi eða svik hans hafi verið að ræða.

11.3. Óheimilt er að nota MasterCard kort eftir að það hefur verið tilkynnt glatað. Finnist kort, sem tilkynnt hefur verið glatað, skal senda það sundurklippt til útgefanda.

12. PERSÓNUVERND

12.1. Útgefandi  skráir í tölvukerfi sín upplýsingar um korthafa, aukakorthafa og ábyrgðar­menn. Upplýsingar sem hér um ræðir eru m.a. kennitala, heimilisfang og aðrar þær upplýsingar sem aðilar hafa veitt útgefanda með útfyllingu eyðublaða og forma útgefanda. 

12.2. Allar upplýsingar um kortareikninga og notkun korta eru vistaðar í tölvukerfi útgefanda. Ópersónugreindar upplýsingar um færslur á korti korthafa eru sendar MasterCard Worldwide, þ.e. upplýsingar um kortnúmer, hvenær færsla er gerð, fjárhæð færslu og hver er starfsemi seljanda.  

12.3. Korthafi veitir Kreditkorti hf. heimild til þess að senda SMS, MMS, tölvupóst eða önnur rafræn skilaboð að hámarki 3 sinnum í mánuði um tilboð, afslætti eða sérkjör frá Kreditkorti hf. eða samstarfsaðilum. Korthafi veitir Kreditkorti hf. heimild til að senda korthafa skilaboð er varðar notkun kortsins eða tilkynningar um breytingar á skilmálum kortsins. Korthafi getur valið um að afskrá sig af póstlista Kreditkorts hf. t.d. skriflega eða símleiðis.

12.4. Vinnsla og geymsla upplýsinga skal vera í samræmi við það sem nauðsyn­legt er til starfrækslu greiðslumiðlunar. Útgefandi skal gæta þess að vinnsla og vistun persónu­upp­lýsinga sé ætíð í samræmi við gildandi lög og reglur.  

13. ÝMSIR SKILMÁLAR

13.1. Reikningshafi og/eða korthafi skulu tafarlaust tilkynna útgefanda verði breyting á heimilisfangi og netfangi hans/þeirra.

13.2. Útgefandi tekur ekki ábyrgð á gall­aðri vöru eða þjónustu sem greitt er fyrir með MasterCard korti, né held­ur á nokkrum öðrum vanefndum seljanda vöru eða þjónustu sem greitt er fyrir með MasterCard korti. Kvörtunum út af slíku skal korthafi beina til viðkomandi seljanda.

13.3. Sé reikningshafi lögaðili eða sjálfstætt starfandi rekstraraðili áskilur útgefandi sér rétt til að kalla eftir ársreikningum hvenær sem er á samningstímanum, sem og þegar mat er lagt á umsókn um kort.

13.4. MasterCard kortum, öðrum en innkaupakortum, fylgja ferðatryggingar. Tryggingaskilmála, eins og þeir eru á hverjum tíma, má nálgast á heima­síðu útgefanda.   

13.5. Upplýsingar um þau hlunnindi er tengjast mismunandi tegundum MasterCard korta má finna á heimasíðu útgefanda korts.

13.6. Telji korthafi og/eða reikningshafi sig hafa orðið fyrir tjóni vegna tækni­legrar bilunar í hraðbanka eða öðru sjálfsafgreiðslutæki, hvílir sönnunar­byrðin á útgefanda að sýna fram á að viðskiptin hafi verið rétt skráð og réttilega færð inn á reikninga og að tæknibilun eða aðrir hnökrar hafi ekki valdið rangri skráningu sem leitt hafi til tjóns. Ábyrgð útgefanda tekur ekki til tjóns sem kann að leiða af því að umbeðin fjárhæð, vara eða þjónusta, fæst ekki afhent.

13.7. Útgefandi tryggir korthöfum aðgang að neyðarþjónustu í síma allan sólarhringinn.

13.8. Viðskiptaskilmálar MasterCard korta, eins og þeir eru á hverjum tíma, eru aðgengilegir á vefsíðu útgefanda, www.kreditkort.is. Útgefandi áskilur sér rétt til breytinga á viðskiptaskilmálunum. Breytingar á skilmálunum skulu kynntar korthöfum eigi síðar en 15 dögum áður en breyttir skilmálar taka gildi. Í tilkynningu um breytta skilmála skal vakin athygli á því ef efnislegar breytingar verða á réttindum eða skyldum korthafa eða reikningshafa og á rétti þeirra til að hætta viðskiptum. Sé MasterCard kort notað eftir að breyttir skilmálar hafa tekið gildi, teljast reikningshafi og korthafi samþykkir breytingunni. Útsending tilkynningar um breytingu á skilmálunum í almennum pósti eða í tölvupósti telst nægileg tilkynning samkvæmt framan­sögðu.

13.9. Öll gjöld, kostnaður og vextir sem falla til samkvæmt skilmálum þessum fara eftir gjaldskrá og vaxtatöflu Kreditkorts hf.

14. ÁGREININGUR

14.1. Mál sem rísa út af broti á viðskiptaskilmálum þessum, svo og inn­heimtu­mál vegna úttekta með MasterCard korti er heimilt að reka fyrir Héraðs­dómi Reykjavíkur.

Reykjavík í apríl 2010

Kreditkort hf.

Prentvæn útgáfa af Viðskiptaskilmálum MasterCard kortanna